Vetëvendosje proteston nesër në Tiranë kundër vizitës së Presidentit të Serbisë

Anëtarë të Qendrës së Lëvizjes Vetëvendosje në Tiranë kanë njoftuar se nesër do të protestojnë kundër vizitës së Presidentit serb në Tiranë, Aleksandër Vuçiq dhe kreut të serbëve të Bosnjës, Milorad Dodik.

Vetëvendosje ka ftuar qytetarët e Tiranës që t’i bashkohen në këtë protestë, transmeton albinfo.ch.

“Ata të dy janë dy politikanë udhëheqës me të kaluar dhe të tashme kriminale, s’kanë shprehur asnjë pendesë për krimet e Serbisë, mohojnë masakrat e luftës. Ata nuk i njohin simbolet tona shtetërore. S’mund të sillemi këtu sikur jemi para një feste. S’jemi ne që i kemi shpallur armiq, janë ata që mohojnë të drejtat tona”, kanë thënë drejtuesit e kësaj partie.

Kjo Lëvizje i ka shpallur Vuçiqin dhe Dodik persona non-grata në Shqipëri.

Më 8 dhe 9 maj, Presidenti i Serbisë, Aleksadër Vuçiq, do të qëndrojë në Tiranë për të zhvilluar takime me kryeministrin Edi Rama dhe shefen e BE-së, Federica Mogherini.