Zbulohet busti i Skënderbeut në Maschito të Italisë

Ministri i Diasporës së Shqipërisë, Pandeli Majko, ka marrë pjesë në ceremoninë festive të 28 Nëntorit në komunitetin arbëresh në qytetin Maschito, në Itali. Gjatë kësaj vizite ministri është shoqëruar nga kryetarja e Komunës së Maschitos, Rossana Musacchio Adorisio. Majko theksoi rëndësinë e të qenit të bashkuar nëpërmjet gjuhës dhe traditave shqiptare, shkruan Albinfo.ch

“Jemi shumë, të shpërndarë nëpër botë, kudo, në Australi, Amerikë, Alaskë, Ukrainë, etj., dhe është shumë e rëndësishme të vazhdojmë t’i mësojmë brezit të ri gjuhën shqipe, kulturën dhe traditat e vendit tonë”, deklaroi Majko.

Aktiviteti më i rëndësishëm i kësaj vizite ishte inaugurimi i bustit të Gjergj Kastriotit Skënderbeut, krijim i skulptorit shqiptar Vladimir Llakaj, dhuruar komunitetit të Maschitos nga nje grup patriotësh shqiptar. Busti i vendosur në sheshin “San Francesco” do të jetë gjithmonë një shenjë krenarie për prejardhjen e këtij komuniteti.