Zvicra do të votojë për ndalimin e burka-s

Përveç se për mbulesën e motivuar nga religjioni, ndalimi, sipas iniciatorëve vlen edhe për ata që mbulojnë fytyrën gjatë akteve vandaliste ose kriminele

Keystone

Zviceranët përfundimisht pritet të votojnë për ndalimin e mbulesës, ose siç njihet më mirë në opinion, për ndalimin e “burka”-s, mbulesës së plotë të grave myslimane, shkruan sda.ch. Kushtin ligjor për t`u votuar në nivel vendi, iniciativa e ka përmbushur me grumbullimnin e rreth 105 mijë nënshkrimeve të vlefshme, njofton kancelaria Federale, që është zyra e cila konstaton vlefshmërinë e iniciativave.

Teksti i iniciativës kërkon që të  mos mbulohet fytyra në hapësira publike ose në objektet e qasshme për të gjithë, transmeton albinfo.ch. Përveç se për mbulesën e motivuar nga religjioni, ndalimi, sipas iniciatorëve vlen edhe për ata që mbulojnë fytyrën gjatë akteve vandaliste ose kriminele.

Mbrapa iniciativës qëndron i ashtuquajturin “Komiteti i Egerkingenit”, i udhëhequr nga deputeti nacional i SVP-së nga Kantoni i Solothurnit. Ky komitet kishte pasur sukses edhe në iniciativën për ndalimin e ndërtimit të minareve, të votuar pak vite më parë.

Deri më tash vetëm Kantoni italishtfolës i Tiçinos e ka futur në fuqi ndalimin e burkas. Atje populli kishte votuar me shumicë votash për këtë ndalesë, e cila ka filluar të veprojë më 1 korrik 2016.