Ish lideri opozitar, nga paraburgimi në arrest shtëpiak

Kolegji prej tre gjyqtarësh ka vendosur që masa e paraburgimit në rastin e, tani të pandehurve, Albin Kurti dhe Albulena Haxhiu, të ndryshohet me arrest shtëpiak

Keystone

Gjykata Supreme e Republikës së Kosovës ka rrëzuar vendimin e Gjykatës Themelore të Prishtinës, në rastin e deputetit Albin Kurti dhe deputetes Albulena Haxhiu. Ndaj këtyre dy deputeteve të Lëvizjes Vetëvendosje u është zbutuar masa e dënimit, nga paraburgimi prej 30 ditësh, në arrest shtëpiak.

“Kolegji prej tre gjyqtarësh ka vendosur që masa e paraburgimit në rastin e, tani të pandehurve, Albin Kurti dhe Albulena Haxhiu, të ndryshohet me masën e arrestit shtëpiak”, thuhet në njoftimin e publikuar sot nga Supremja.

Sipas të njëjtit njoftim Gjykata Supreme duke vendosur lidhur me kërkesën për mbrojtje të ligjshmërisë, të mbrojtësve të të pandehurve Albin Kurti dhe Albulena Haxhiu, ka aprovuar pjesërisht kërkesën dhe ka ndryshuar aktvendimin e formës së prerë, “ashtu që ndaj të pandehurve ka ndërprerë masën e paraburgimit dhe u ka caktuar arrest shtëpiak”.

Të pandehurit Albin Kurti, masa e arrestit shtëpiak do t’i zgjasë deri me datën 28.12.2015, ndërsa të pandehurës Albulena Haxhiu, masa e arrestit shtëpiak do t’i zgjasë deri me datën 07.01.2016.

Dy deputetët e Vetëvendosjes, janë arrestuar nga Policia dhe dënuar nga gjykata nën dyshimin se kanë hedhur gaz lotsjellës në seancat e Kuvendit të Kosovës. Së bashkë me këta deputetë, masë ndalese kanë edhe 11 deputetë të tjerë, të cilët kanë hedhur gaz lotsjellës apo e kanë sjellë gazin brenda seancave.

Opozita ka hedhur gaz lotsjellës në Kuvend, në përpjekje për ta ndaluar punën e  Parlamentit, në shenjë pakënaqësie me dy marrëveshjet e fundit të Qeverisë, njërën me Serbinë dhe tjetrën me Malin e Zi. Sipas opozitës, këto marrëveshje cenojnë juridikisht dhe territorialisht Republikën e Kosovës.