Shembje dheu, mbyllet magjistralja Shkup-Prishtinë

Në rrugën N2, Prishtinë-Hani i Elezit, në Grykën e Kaçanikut janë shkaktuar rrëshqitje të dheut, kështu që kjo pjesë e rrugës është mbyllur tërësisht

Reshjet e pandërprera të shiut, kanë shkaktuar shembje dheu edhe në magjistralen Prishtinë-Shkup, duke e bllokuar plotësisht këtë aks rrugor. Siç ka njoftuar Ministria e Infrastrukturës, rrugën N2, Prishtinë-Hani i Elezit, në Grykën e Kaçanikut janë shkaktuar rrëshqitje të dheut, kështu që kjo pjesë e rrugës është mbyllur tërësisht.

Rruga, sipas Ministrisë së Infrastrukturës, dikaster që merret me rrugë, është bllokuar në pjesën te muri mbrojtës, ku kohë më parë pati intervenuar KFOR-il.

“Kompania për mirëmbajtjen e rrugëve është duke punuar dhe duke bërë përpjekje për ta liruar sa më parë pjesën e bllokuar të rrugës. Me këtë rast kërkojmë nga qytetarët që të kenë mirëkuptim deri në sanimin e gjendjes së shkaktuar, ndërsa për lirimin e rrugës do t’ju njoftojmë me kohë”, thuhet në njoftimin e Ministrisë.

Qytetarët që kanë të domosdoshme për të shkuar në Maqedoni ose anasjelltas për të ardhur ë Kosovë, duhet ta shfrytëzojnë pikëkalimin Glloboçicë-Jazhincë, nëpër malet e Sharrit. Në vendin ku janë shkaktuar shembjet e dheut, edhe më parë ka pasur probleme të njëjta.