Nis ndërtimi i Spitalit të Fëmijëve, më i miri në rajon

Me ndihmën e Emirateve të Bashkuara Arabe, sot në Prishtinë është vënë gurthemeli i Spitalit Pediatrik-Kirurgjik në vlerë 22 milionë euro

Falë një donacioni në vlerë 22 milionë euro, që ka ndarë Shteti i Emirateve të Bashkuara Arabe, sot në Prishtinë është vënë guthemeli për ndërtimi e Spitalit Pediatrik-Kirurgjik, që do të jetë më moderni në rajon. Gurthemelin e kanë vënë presidentja e Kosovës, Atifete Jahjaga dhe ministrja e Shtetit e Emirateve të Bashkuara Arabe, Maitha Al Shamsi.

Spitalit Pediatrik-Kirurgjik do të ndërtohet në hapësirat e Qendrës Klinike Universitare të Kosovës. Ky spital, siç u tha në promovim, do të jetë spitali më modern jo vetëm në Kosovë, por edhe në rajon, me aparaturën më moderne, të cilën do ta përdorin njerëz profesional.

“Me ndërtimin e këtij spitali në këtë vend synojmë që të gjitha shërbimet pediatrike t’i ofrojmë në një vend më me shumë profesionalizëm dhe dashuri”, ka thënë presidentja Jahjaga  Sipas saj, marrëveshja me EBA-në, shënon një ndër marrëveshjet më të rëndësishme të nënshkruara, pasi shënon dhe donacionin më të madh në sektorin e shëndetësisë.

Sipas një njoftimi të Presidencës, spitali i ri është një donacion i Emirateve të Bashkuara Arabe, në vlerë prej 22 milionë euro. Marrëveshja për ndërtimin e tij është nënshkruar në prill të vitit të kaluar, gjatë një vizite të Presidentes Jahjaga në Abu Dhabi. Realizimi i këtij projekti pritet të përfundojë në vitin 2018.

“Vënia e gurthemelit të këtij spitalit për shërbime gjithëpërfshirëse Pediatrike dhe Kirurgjike, shënon një hap shumë të rëndësishëm në thellimin dhe fuqizimin e mëtejmë të bashkëpunimit dhe të miqësisë midis Republikës së Kosovës dhe Emirateve të Bashkuara Arabe, midis institucioneve dhe midis popujve të të dyja vendeve”, deklaroi Jahjaga.

Institucionet  dhe  qytetarët e Kosovës, sipas presidentes në ikje, do t’i jenë  përjetë mirënjohës Mbretëreshës së Emirateve të Bashkuara Arabe, Sheika Fatima bint Mubarak, për këtë donacion zemërgjerë.  “Unë do t’i jem gjithmonë mirënjohëse  Nënës  Mbretëreshë Sheika Fatima bint Mubarak, mikes time te madhe, ashtu siç e quan populli i saj, për bujarinë e treguar”, tha Jahjaga.