Kosovës nuk i lejohet pjesëmarrja në Asamblenë Parlamentare të KE-së

Përbërjes së delegacionit të Kosovës nuk i është lejuar pjesëmarrja zyrtare dhe as adresimi në punimet e Asamblesë Parlamentare të Këshillit të Evropës (KE), ndonëse ka pasur përpjekje për t’u arritur një gjë e tillë.

Burime të Kohës Ditore kanë bërë të ditur se ka pasur përfshirje edhe të vetë qeveritarëve turq, që një gjë e tillë të arrihet, por fakti që një pjesë e konsiderueshme e shteteve anëtare të KE-së nuk e njohin pavarësinë e Kosovës ka pamundësuar një gjë të tillë.

Ndryshe dje në ndërtesën e Këshillit të Evropës ka qëndruar ministri në largim i Arsimit, Enver Hoxhaj, ndërkaq sot atij pritet t’i bashkohen edhe anëtarët e Kryesisë së përbërjes së fundit të Kuvendit të Kosovës, Xhavit Haliti dhe Ibrahim Gashi. Ministri Hoxhaj ka pasur disa takime me përfaqësues të shteteve që e mbështesin pavarësinë e Kosovës, nga të cilët ka kërkuar mbështetjen në disa qëllime që Qeveria e Kosovës ka në raport me pretendimet e raportuesit Dick Martyt.

“Ne kemi kërkuar që Martyt t’i kërkohet dorëzimi i provave në EULEX dhe që të nisë një hetim sa më i shpejtë nga EULEX-i”, ka thënë Hoxhaj.

Dje sekretariatit të Këshillit të Evropës i është dorëzuar edhe peticioni me nënshkrimet mbi 250 mijë shqiptarëve që kundërshtojnë raportin e Martyt. Dorëzimin e peticionit e ka bërë kryetari i organizatës së veteranëve të luftës, Muharrem Xhemajli.

Raporti i Martyt pritet që të martën të mbështetet nga Këshilli i Evropës me një rezolutë. Draft-rezoluta aktuale është mjaft negative për Kosovën. Shqipëria dhe Turqia po përpiqen që ta përmirësojnë duke e amendamentuar. Po përpiqen që të zhdukin nga rezoluta fjalët “prova” dhe “fakte”, duke i zëvendësuar ato me “dyshime” dhe “thashetheme”.

Shpëtim Idrizi nga partia e çamëve, Kastriot Islami dhe Damjan Lekë Gjiknuri nga Partia Socialiste, ishin deputetët që lobonin te shumica e delegacioneve të 47 shteteve anëtare të KE-së. Arenca Trashani dhe Ilir Rrusmajli do të jenë në Strasburg nga sot, më saktë dita e dytë e Asamblesë Parlamentare.

Ndërsa nesër Asamblesë Parlamentare do t’i drejtohet presidenti i Serbisë, Boris Tadiq dhe kryeministri shqiptar, Sali Berisha.