Zvicra i jep dritën e gjelbër lëvizjes së lirë me Kroacinë

Para se të hyjë në fuqi nga ana e qeverisë, zgjerimi duhet të shikohet se a është në përputhje me legjislacionin në fuqi sa i përket migracionit, në raport me Bashkimin Evropian

Pas qeverisë dhe Dhomës Nacionale, edhe Dhoma e Kantoneve (Senati) sot ka vendosur në favor të zgjerimit të lirisë së lëvizjes me Kroacinë.

Me 40 vota pro dhe vetëm 3 kundër, kjo dhomë ka vendosur që ky zgjerim të bëhet por me disa kushte. Para se të hyjë në fuqi nga ana e qeverisë, zgjerimi  duhet të shikohet se a është në përputhje me legjislacionin në fuqi sa i përket migracionit, në raport me Bashkimin Evropian.

Siç dihet një gjë e tillë vihet në pikëpyetje si pasojë e ndryshimeve që i ka imponuar votimi në vitin 2014 i Iniciativës kundër Migracionit Masiv. Ajo iniciativë ka kushtëzuar që në kushtetutën e Zvicrës të hyjë qëndrimi i cili ndalon çdo marrëveshje ndërkombëtare që bjen ndesh me përmbajtjen e tekstit të votuar tüë iniciativës.