Zbulimi i studentëve kosovarë po arrin sukses të jashtëzakonshëm

Ky aplikacion dallon nga aplikacionet e deritanishme të kësaj fushe për shkak se zgjidh detyra të matematikës, duke përshkruar secilin hap të tyre

Erjon Paçarizi, Alban Robelli dhe Admir Jashari janë tre studentë të Departamentit të Shkencave Kompjuterike në Fakultetin e Shkencave Matematiko-Natyrore të Universitetit të Prishtinës, kanë krijuar një aplikacion për të ndihmuar studentët në detyrat e matematikës, program i njohur si “MalMath”, shkruan ‘Prishtinainsight.com’.

Aplikacioni i krijuar nga këta studentë deri më tani ka arritur afër 4 milionë shkarkime në sistemin android, numër i cili po vazhdon të rritet me shpejtësi të jashtëzakonshme, përcjell albinfo.ch.

Ky aplikacion dallon nga aplikacionet e deritanishme të kësaj fushe për shkak se zgjidh detyra të matematikës, duke përshkruar secilin hap të tyre.

Përdoruesve dhe shkarkuesve të “MalMath”-it rezultojë që iu pëlqeu dhe i hyri në punë shumë, rrjedhimisht në aplikacionin për shkarkim në android, ‘Play Store’, ‘MalMath’ është vlerësuar me notën 4.5.

Në hapësirën e komenteve të këtij aplikacioni në ‘Play Store’ numërohen rreth 50 mijë replika nga përdoruesit, e që shumica nga ta e konsiderojnë si mjaft të dobishëm këtë aplikacion.

Alban Robelli, njëri nga krijuesit e këtij aplikacioni thotë se misioni i tyre është që të pajisin studentët me zgjidhje të detajuara për problemet e matematikës. “Ideja është për të ndihmuar nxënësit të kuptojnë mënyrën e zgjidhjes së problemeve të matematikës dhe jo vetëm, duke e dhënë rezultatin e problemit”, thotë ai.

Në anën tjetër, ideatori i këtij aplikacioni, Erjon Paçarizi tha që  “gjatë studimeve në Departamentin e Shkencave Kompjuterike në UP, ligjëratat nga kurset e programimit dhe matematikës kanë qenë një kombinim më së i nevojshëm për ta krijuar një aplikacion siç është “MalMath”.

Aplikacioni që është lancuar më 5 maj të vitit 2015 ka si gjuhë zyrtare anglishten, mirëpo, funksionon edhe në 13 gjuhë të tjera siç janë: shqip, gjermanisht, spanjollisht, italisht, frëngjisht, arabisht, kinezisht, e të tjera gjuhë.