GNK: Maqedonia shoqërohet me trende shqetësuese

Këto trende, sipas Grupit Ndërkombëtar të Krizave, kërcënojnë shtetin civil shumëkombësh

Dhjetë vjet që prej nënshkrimit të Marrëveshjes së Ohrit, e cila u dha fund luftimeve midis shqiptarëve dhe maqedonasve, pjesa më e madhe e kësaj marrëveshjeje është zbatuar dhe nuk ka gjasë për ripërtëritjen e konfliktit.

Ky është konstatimi i Grupit Ndërkombëtar të Krizave, i cili në një raport të publikuar me rastin e përvjetorit të nënshkrimit të Marrëveshjes së Orhit, megjithatë vlerëson se ky vend mbetet i brishtë dhe shoqërohet me trende shqetësuese – rritjen e nacionalizmit etnik maqedonas, pushtimin e shtetit nga ana e kryeministrit dhe partisë së tij, rënien e pavarësisë në media dhe drejtësi, rritjen e ndasive në shkolla dhe ngathtësinë e decentralizimit, transmeton REL.

Këto trende, siaps GNK-së, kërcënojnë shtetin civil shumëkombësh.

Duke folur për partitë politike shqiptare, grupi vlerëson se ato duhet të forcojnë besnikërinë e tyre ndaj shtetit dhe të angazhohen më thelbësisht në politikë dhe vendimmarrje.

Nga ana tjetër, “rritja e nacionalizmit po i ndan maqedonasit në mënyrë jo të shëndetshme në ‘patriotë’ dhe ‘tradhtarë’, duke irrituar kësisoj shqiptarët dhe duke shkurajuar miqtë e Maqedonisë në Bashkimin Evropian”.

Lidhur me raportet midis dy komuniteteve etnike, GNK vlerëson se qeveria është kritikuar për mungesë angazhimi për të siguruar një përfaqësim të barabartë, për të zbatuar ligjin mbi gjuhën dhe për të kundërshtuar përjashtimin kulturor.

Duke ofruar një sërë rekomandimesh për elitën politike dhe faktorin ndërkombëtar, Grupi Ndërkombëtar i Krizave, mes tjerash, vlerëson se qytetarët e të gjitha etnive dhe bindjeve politike kanë arsye për të festuar përvjetorin e dhjetë të Marrëveshjes së Ohrit, e cila “ka bërë shumë në zvogëlimin e diskriminimit, jobarazisë dhe në ruajtjen e unitetit”.