Kush e shkatërroi PTK-në?

Ish-drejtori i PTK-së, Shyqyri Haxha, përmend njerëzit e PDK-së që kanë ndikuar për nënshkrimin e kontratës me kompaninë virtuale “Z-Mobile”. Kjo e fundit e paditi në Arbitrazh PTK-në dhe fitoi 30 milionë euro

Posta dhe Telekomi i Kosovës, kompania më profitabile në vend, për 17 vjetet e kaluar, po shkon drejt shkatërrimit. Përgjegjësinë për “fundosjen” e kësaj kompania e kanë njerëzit e Partisë Demokratike të Kosovës, e cila për 16 vjet është drejtuar nga Hashim Thaçi, tashmë presidenti i Kosovës.

Drejtues të PDK-së, siç shkruan sot gazeta “Insajderi”, kanë hise në secilën kontratë të dëmshme për PTK-në. Ata po ashtu kanë lidhje edhe me vëllezërit Devolli, e cila së fundi ka paditur në Gjykatën e Arbitrazhit Ndërkombëtarë dhe ka fituar një kontest me PTK-në, duke fituar procesin në vlerë 30 milionë euro.

Hashim Thaçi ishte përmendur në vitin 2011 si njeriu kryesor nga Shyqyri Haxha që kishte ushtruar presion për nënshkrimin e një kontrate për themelimin e kompanisë virtuale të telefonisë mobile “Z-Mobile”, asokohe pronë e vëllezërve Shkëlqim dhe Blerim Devolli.

Detajet e këtij presioni i kishte zbuluar ish-drejtori i Postës dhe Telekomit të Kosovës, gjatë intervistimit nga hetuesit e EULEX-it që po hetonin këtë kontratë të cilësuar si të dëmshme për ndërmarrjen publike, e cila fitonte vetëm 22 për qind. Më vonë, kontrata ishte ndryshuar në favor të PTK-së, që i jepte asaj 27 për qind të fitimit.

Presioni i Thaçit mbi drejtorin e PTK-së, ishte zbuluar nga ish-prokurori i EULEX-it, Joachim Stollberg gjatë intervistimit të Haxhës në cilësinë e të dyshuarit.

Haxha u kishte thënë hetuesve të EULEX-it se ishte detyruar nga ish-kryeministri Hashim Thaçi që ta nënshkruante kontratën me kompaninë Dardafon.net (M-mobile)

Por disa muaj më vonë gjatë intervistës që i ka dhënë prokurorit në cilësinë e të dyshuarit për tri vepra penale, Shyqyri Haxha nuk e kishte përmendur presionin e ushtruar nga Thaçi.

“E kam thirrur Hashim Thaçin kur jemi përballur me problemin e Ardianit (Shatkut v.j.) Adi Sparkes (Ish-ambasador i Mbretërisë së Bashkuar në Prishtinë v.j.) më sugjeroi ta thërrisja Thaçin. E thirra dhe i thash se imazhi i kompanisë po dëmtohet sepse kemi mësuar se dy aksionarë kanë probleme. Ai më tha se ky nuk ishte problemi i tij dhe se unë duhet ta zgjidhja atë. Ai nuk deshi të përfshihej në këtë”, i kishte thënë Haxha prokurorit.

“Nuk është e vërtetë se Thaçi më ka thirrur në telefon. Kam përjetuar një padrejtësi të madhe gjatë këtij procesi dhe kjo ka qenë qasje e përjashtuar dhe ka nxitur hetimin”, kishte thënë ai më tej.

Haxha, ishte akuzuar së bashku me vëllezërit Devolli, kryetarin e Bordit të PTK-së Rexhë Gjonbalaj dhe përfaqësuesin ligjor të kompanisë nga Peja, Ismet Bojku.