Prezantimi turistik i Prizrenit në “360 shkallë”

Drejtoria e Zhvillimit Ekonomik dhe e Turizmit e Komunës së Prizrenit është afër finalizimit të projektit për paraqitjen virtuale të vlerave të qytetit, i cili javë më parë kishte nxitur kundërthënie të shumta për shkak të shumës së lartë të mjeteve të investuara.

Sipas përgjegjësve, projekti në fjalë do të përurohet brenda disa javësh dhe do të mundësojë prezantimin gjithëpërfshirës të Prizrenit përmes ueb faqes, ku vizitorët do të kenë mundësi që t’i navigojnë monumentet e detajet brenda tyre me fotografitë e bëra në 360 shkallë, shkruan Koha Ditore.

“Qëllimi i krijimit të ueb faqes ‘Prizreni 360 shkallë’ është promovimi i vlerave të qytetit brenda dhe jashtë Kosovës. Do të ngërthejë në vete të gjitha elementet dhe potencialin që posedon Komuna e Prizrenit në sferën e turizmit. Gjithashtu përmes këtij portali mundësohet qasja në shërbime më cilësore për të gjithë ata që planifikojnë ta vizitojnë Prizrenin”, ka thënë drejtori i Zhvillimit Ekonomik dhe i Turizmit i Komunës së Prizrenit, Shend Kabashi.

Vlera e projektit është 28 mijë euro. Sipas Kabashit, duhet angazhim i madh për paraqitjen e të gjitha objekteve e monumenteve në 360 shkallë, të cilat fotografi më pas do të shërbejnë edhe për krijimin e kartolinave dhe të produkteve të tjera turistike që i mundësojnë sigurimin e të hyrave vetjake pushtetit lokal.