Rritet dënimi i vrasësit të Zejnepe Berishës

Gjykata ka vendosur të dënojë N.B. me 17 vjet burgim. Më 23 tetor të vitit 2015, N.B. kishte therur për vdekje gruan e tij 20 herë radhazi

Gjykata e Apelit në Kosovë ka aprovuar ankesën e prokurorisë dhe ka rritur dënimin e vrasësit të Zejnepe Berishës.

Sipas njoftimit, për të akuzuarin N.B., që ishte shpallur fajtor për “Vrasje të rëndë” dhe “Lëndim të lehtë trupor”, dënimi prej 12 vjetësh e 6 muajsh burgim ishte i butë.

Andaj gjykata ka vendosur të dënojë N.B. me 17 vjet burgim. Më 23 tetor të vitit 2015, N.B. kishte therur për vdekje gruan e tij 20 herë radhazi.

Në njoftim, Gjykata ka thënë se “nuk janë vlerësuar po ashtu realisht, as rrethanat rënduese siç është mënyra e kryerjes së veprës penale, ku i akuzuari në prezencën edhe të të miturës e privon nga jeta, tani të ndjerën Z. B., dhe atë duke e goditur 20 (njëzetë) herë radhazi, në të gjitha pjesët e trupit, me këmbëngulësi dhe në mënyrë brutale. Rrethanë tjetër e cila nuk është vlerësuar si duhet është edhe motivi i kryerjes së veprës penale dhe sjellja e mëparshme e të akuzuarit ndaj familjes por edhe ndaj tani të ndjerës, pra para kryerjes së veprës penale”.

Ankesa e mbrojtësit e të akuzuarit N. B., është refuzuar si e pabazuar.