Aktori Colin Firth merr shtetësinë italiane

Firth ka thënë se do të mbetet një shtetas i dyfishtë, duke shtuar se gruaja e tij e lindur në Itali gjithashtu do të kërkojë shtetësinë britanike

Aktori britanik, Colin Firth, i cili shpesh ka luajtur rolin e një anglezi të thjeshtë në filmat e tij të shumtë, është bërë shtetas italian, ka njoftuar Ministria e Brendshme e Italisë.

“Aktori shumë i njohur, i cili fitoi Oskar për filmin ‘The King’s Speech”, është i martuar me një qytetare nga vendi ynë dhe shpesh ka shprehur dashurinë e tij për vendin tonë”, thuhet në njoftimin e Ministrisë.  Firth në anën tjetër, ka thënë se do të mbetet një shtetas i dyfishtë, duke shtuar se gruaja e tij e lindur në Itali gjithashtu do të kërkojë shtetësinë britanike.

Aktori britanik është i martuar me producenten italiane Livia Giuggioli që nga viti 1997, derisa çifti jeton me dy djemtë e tyre në Britani. Ndryshe nga disa vende të tjera të BE-së, Italia dhe lejojnë shtetësinë e dyfishtë. Një numër i vendeve të BE-së, përfshirë Gjermaninë, Francën dhe Irlandën, kanë raportuar një rritje të qytetarëve britanikë që kërkojnë shtetësi të re.