Dorëhiqet drejtori i SHSKUK-së, në vend të Gjocajt caktohet Basri Sejdiu

"Shëndetësi cilësore pa buxhet nuk ka. Reformë e re, shërbim i ri e me buxhet të vjetër historik, madje me buxhet të zvogëluar edhe krahasuar me vitet paraprake, nuk ka dhe nuk mund të ketë”

Drejtori i Shërbimit Spitalor dhe Klinik Universitar të Kosovës, Curr Gjocaj, ka dhënë dorëheqje të parevokueshme nga posti i tij. Në letrën e tij dërguar bordit dhe ministrit të Shëndetësisë, Uran Ismailit, Gjocaj ka thënë se nuk ka mundur të bëjë ndryshime, pasi gjendja momentale e shëndetësisë i ka rrënjët e veta që nga paslufta dhe është mjaft vështirë të zhbësh një sistem, i cili që në themelin e tij është ndërtuar keq.

“Mbetem krenar për sukseset e SHSKUK-së kur merret për bazë mospërkrahja, se sa pak është investuar, duke mos qenë as edhe për afërmi prioritet. Prioritet as me fjalë e as me veprime. Shëndetësi cilësore pa buxhet nuk ka. Reformë e re, shërbim i ri e me buxhet të vjetër historik, madje me buxhet të zvogëluar edhe krahasuar me vitet paraprake, nuk ka dhe nuk mund të ketë”, ka thënë ai në letrën e dorëheqjes.

Ndërkaq, ministri i Shëndetësisë, Uran Ismaili, e ka falënderuar Gjocajn për punën që ka bërë deri tani. “Shëndetësia ka nevojë për reforma të thella. Na pret një rrugë e gjatë, por atë tashmë e kemi filluar”, ka thënë Ismaili. Bordi menjëherë pas dorëheqjes ka caktuar ushtrues detyre të drejtorit Basri Sejdiun, i cili deri më tashti ishte shef i Klinikës së Kardiologjisë Invazive.