Protestojnë gazetarët në Prishtinë, kërkojnë liri në raportim dhe siguri

Kjo protestë u organizua në mbështetje të redaktorit të gazetës online “Insajderi”, i cili u sulmua një ditë më parë

Gazetarë, anëtarë të shoqërisë civile, dhe qytetarë të shumtë, kanë protestuar para objektit të Qeverisë dhe Kuvendit mbrojtje të lirisë së mediave dhe sigurisë së gazetarëve.

Kjo protestë u organizua në mbështetje të redaktorit të gazetës online “Insajderi”, i cili u sulmua një ditë më parë.

Kryetari i AGK-së, Shkëlqim Hysenaj u ka bërë thirrje organeve të drejtësisë që të merren më seriozisht me këto sulme ndaj gazetarëve, që sipas tij, dita ditës po rritet numri i tyre.

Hysenaj, ka thënë se drejtësia po i neglizhon sulmet ndaj gazetarëve dhe se protesta organizohet qëllimshëm para institucioneve, sepse ato duhet të mendojnë për sigurinë e gazetarëve.

Ndërsa i sulmuari, Vehbi Kajtazi, kryeredaktor i Insajderit, ka thënë se presioni ndaj gazetarëve po shkon duke u rritur, nga njerëz që kanë lidhje me pushtetin.

“Ky sulm ka ndodhur për shkak të punës sime, pas një seri shkrimesh që kam pasur javën e kaluar, sepse personazhi është i lidhur direkt me ato, por këto sulme nuk do të më ndalin, përkundrazi”, ka thënë Kajtazi.

Ai u sulmua gjatë ditës së premte në një nga lokalet në kryeqytet. Për këtë rast disa persona janë shoqëruar më polici.