Çifti zviceran sulmohet në Indi

Mediat lokale kanë raportuar se Clerc ka thyer kafkën, ndërsa Droz dorën. Ata janë duke u trajtuar në një spital në Delhi, ndërsa nuk ka pasur arrestime

Një çift zviceran është sulmuar në Fatehpur Sikri, një monument 44 kilometra larg Taj Mahalit, ka njoftuar policia indiane.

Policia ka thënë për BBC-në se katër persona kishin sulmuar Quentin Jeremy Clerc dhe Marie Droz pas një përplasjeje të dielën në Agra.

Mediat lokale kanë raportuar se Clerc ka thyer kafkën, ndërsa Droz dorën.

Ata janë duke u trajtuar në një spital në Delhi, ndërsa nuk ka pasur arrestime.

Clerc ka thënë për gazetën “The Times” se përplasja nisi kur burrat nisën t’i fotografonin.

Sipas raportit policor, burrat detyruan Drozin të bënte selfie me ta dhe e mbajtën atë ashtu për një orë, para se ta sulmonin.

“Çifti erdhi në stacionin policor dhe i dërguam në spital për trajtim. Ata nuk donin të shkruanin një raport, por ne regjistruam rastin kundër katër burrave”, ka thënë inspektori i policisë, Amit Pathak, shkruan Albinfo.ch.