Ministri Makolli priti përfaqësuesit e mësimit shqip në Suedi

Në delegacioni kishte pjesëtarë të mësimit të gjuhës shqipe në Diasporë dhe përfaqësues të arsimit dhe të kulturës nga pala suedeze

Me rastin e realizimit të ekskursionit mësimor –kulturor në Kosovë dhe në Shqipëri ”Ta njohim atdheun” të 110 nxënësve dhe mësuesve me mësim plotësues nga Suedia, i organizuar nga Ministria e Diasporës dhe të bashkëkoordinuar nga MASHT-i, ministri i Diasporës, Ibrahim Makolli, priti një delegacion të përfaqësuesve të arsimit dhe të shoqatave nga Suedia.

Delegacioni ishte i përfaqësuar nga pjesëtarë të arsimit plotësues të gjuhës shqipe në Diasporë, si dhe nga përfaqësues të arsimit dhe të kulturës nga pala suedeze.Ministri Makolli u dëshiroi mirëseardhje mysafirëve dhe e falënderoi shtetin suedez për mbështetjen dhe trajtimin e mirë që kanë shtetasit e Kosovës në Suedi.

“ Suedia ka përkrahur dhe vazhdon ta përkrahë edhe sot shtetin e Kosovës , ka mbi dhjetë vjet që Kosova ka dalë nga lufta dhe pa mbështetjen e miqve tanë nuk do të mund të dilnim nga ajo gjendje tepër e rëndë që ndodhej Kosova në fund të luftës “, theksoi, ministri Makolli.

Në vazhdim, ai foli për rolin që ka luajtur mërgata jonë në organizimin e jetës në Kosovë nën okupimin serb, ndihmë kjo që e vlerësoi vendimtare për qëndresën dhe mbijetesën nën atë okupim të egër.

Ministri Makolli, në vazhdim, i njoftoi për punën që po bën Ministria e Diasporës përkitazi me mësimin plotësues në Diasporë dhe i njoftoi ata për projektet e mëtutjeshme të Ministrisë, duke e potencuar organizimin e projektit të ardhshëm “Konferencën kombëtare për institucionalizimin e mësimit plotësues në Diasporë”, në të cilën përfundimisht do të qartësohen mënyrat e organizmit, koordinimi, planprogramet, avancimi dhe një sërë faktorësh relevantë për zhvillimin dhe cilësinë e mësimit plotësues në Diasporë.

Ministri Makolli shprehu interesimin e tij për avancimin e kuadrit mësimor dhe sqaroi mundësitë për mënyrat e organizimit të përgatitjeve për këtë proces shumë të rëndësishëm , që do të realizohet nga MeD-ja, MASHT-i dhe Universiteti i Prishtinës, gjithnjë duke e koordinuar punën me vendet mikpritëse, ku jeton e vepron diaspora e Kosovës.

Përfaqësuesja e palës suedeze e falënderoi ministrin Makolli për mikpritjen në Republikën e Kosovës dhe u shpreh e kënaqur me punën dhe rezultatet që tregojnë nxënësit dhe mësimdhënësit shqiptarë në Suedi.

Edhe përfaqësuesi i prindërve të nxënësve, i pranishëm në takim, shprehu falënderimin e tij për angazhimin e Ministrisë së Diasporës dhe kujdesin që ka treguar në këta muaj të themelimit të saj. Përgëzoi ministrin Makolli dhe vlerësoi lart punën e Ministrisë së Diasporës. Në takim u cilësua si akt shumë i rëndësishëm themelimi i Ministrisë së Diasporës dhe u vlerësua se në Diasporë janë intensifikuar dukshëm hapat e parë dhe pozitive të punës së ministrisë.

Ministri Makolli i falënderoi edhe njëherë mysafirët dhe i inkurajoi për sukseset e mëtutjeshme në ruajtjen dhe kultivimin e identitetit kulturor, duke u angazhuar edhe në integrimin sa më të madh të komunitetit tonë në të gjitha sferat e jetës , në shtetet ku jetojnë.

Një grup i nxënësve dhe arsimtarëve nga Suedia në një eskurzion një javor do ta vizitojnë në Kosovën dhe Shqipërinë. Eskurzioni u organizua në kuadër të 100 vjetorit të pavarësisë së Shqipërisë nga Ministria e Diasporës, me përkrahjen e Ministrisë së Arsimit Shkencës dhe Teknologjisë së Kosovës, si dhe Ministrisë së Arsimit dhe Shkencës së Shqipërisë, thuhet në njoftim.