Presidenti Thaçi: E vërteta për vrasjen e Ivanoviqit do t’i dhembë dikujt

“E vërteta do të dalë, ndonëse dikujt do t’i dhembë”, ka paralajmëruar Thaçi, sipas të cilit, këto janë të dhëna paraprake nga autoritetet hetuese

Presidenti i Kosovës, Hashim Thaçi ka thënë se shumë shpejt do të zbulohen vrasësit e politikanit serb nga veriu i Kosovës, Oliver Ivanoviq dhe se e vërteta do t’i dhemb dikujt. Në një intervistë për televizionin N1, i pari i Kosovës ka vlerësuar se motivet prapa krimit kanë qenë të natyrës kriminale.

“Hetimi rreth vrasjes së Olliver Ivanoviqit po vazhdon, deri më tani nuk ka indikacione për një rast të motivuar politikisht, por informatat e para sugjerojnë motive kriminale, mafioze. Ne do të bashkëpunojmë me autoritetet serbe, në mënyrë që të marrin informata të duhura”, ka theksuar presidenti kosovar.

“E vërteta do të dalë, ndonëse dikujt do t’i dhembë”, ka paralajmëruar Thaçi, sipas të cilit, këto janë të dhëna paraprake nga autoritetet hetuese.

“Nuk mund të them më shumë, institucionet relevante do t’i japin rezultatet e tyre. Megjithatë, mund të bëhet fjalë për struktura kriminale të lidhura me qarqe të caktuara politike”, ka deklaruar Thaçi.