Federer, sportisti i vitit në botë

Fituesi i 20 Grand Slameve, që shkëlqeu në Australian Open dhe në Wimbledon 2017, dominoi ceremoninë e çmimeve, duke lënë pas emra si Cristiano Ronaldo, Lewis Hamilton dhe Mo Farah

Keystone EPA/SEBASTIEN NOGIER

Tenisti zviceran, Roger Federer është shpallur sportisti i vitit në ceremoninë e “Laureus World Sports Awards”, të zhvilluar në Montekarlo.

Fituesi i 20 Grand Slameve, që shkëlqeu në Australian Open dhe në Wimbledon 2017, dominoi ceremoninë e çmimeve, duke lënë pas emra si Cristiano Ronaldo, Lewis Hamilton dhe Mo Farah, përcjell albinfo.ch.

“Nuk e kisha besuar se mund të kthehesha sërish në këto nivele, por ky vit ishte diçka tjetër”, deklaroi tenisti 36-vjeçar, i cili është i pari edhe në renditjen e përgjithshme të tenistëve, duke thyer rekord si tenisti më i moshuar numër një në botë.

Për femra, trofeun e rrëmbeu Serena Williams, e cila në vitin 2017 fitoi Grand Slamin e 23 të saj në karrierë.

Kampionët e Botës në Formula 1, Mercedes, u vlerësuan si skuadra e vitit dhe titullin e tërhoqi kampioni i vitit 2017, Lewis Hamilton.

Një çmim i veçantë shkoi edhe për skuadrën braziliane Chapecoense, me vlerësimin “Momenti më i mirë i vitit”, me rikthimin që bëri kjo skuadër pas rrëzimit të avionit të ekipit në vitin 2016.