Vetëvendosje e “priti” me domate Cooperin

Disa protestues kishin arritur të depërtojnë brenda oborrit të qeverisë, nëpërmjet derës së pasme. Kryeministri Thaçi e dënon këtë veprim

 I ashtuquajturi lehtësues në negociatat Prishtinë-Beograd, Robert Cooper vizitoi të enjten Prishtinën, mirëpo nuk u prit mirë nga simpatizantët e Lëvizjes Vetëvendosje të cilët duke kundërshtuar mundësinë e rinisjes së negociatave me Serbinë, e gjuajtën me domate objektin e  Qeverisë ku po mbahej takimi.Madje disa nga protestues të Vetëvendosjes kishin arritur të depërtojnë brenda oborrit të qeverisë, nëpërmjet derës së pasme të rrethojave të objektit.Ky veprim, ndërkaq u kundërshtua nga kryeministri Hashim Thaçi, i cili bashkë me zëvendëskryeministren Edita Trahiri takuan ndërmjetësin Cooper.“Shpalosja e ambicieve politike duhet të bëhet në mënyrë institucionale dhe demokratike në Parlament, e jo përmes dhunës së shfaqur kundër zyrtarëve të lartë të Bashkimit Evropian. Këto veprime janë të papranueshme dhe si të tilla të dënueshme nga Qeveria e Republikës së Kosovës”, ka thënë Thaçi, deklaron Zyra për Informim e Kryeministrisë.Me ndërmjetësin Cooper, Thaçi ka diskutuar për implementimin e marrëveshjeve të arritur mes Republikës së Kosovës dhe Serbisë gjatë procesit të bisedimeve teknike në Bruksel.Sipas të njëjtit njoftim, Thaçi ka thënë se implementimi i marrëveshjeve duhet të implementohen edhe nga ana e Serbisë, pasi ato janë në dobi të qytetarëve të të dy shteteve dhe në dobi të forcimit të paqes, stabilitetit dhe bashkëpunimit rajonal.Ndërmjetësi i BE-së Cooper, ka thënë se marrëveshjet e nënshkruara nga përfaqësuesit e Kosovës dhe Serbisë duhet të implementohen sa më shpejtë, në mënyrë që të ecet përpara në proces.

Vizita në Kosovë e ndërmjetësit Cooper ka pasuar vizitën në Beograd, ku ai një ditë më parë është takuar me këshilltarin e presidentit të Serbisë, Marko Gjuriq.