Nishani takon mërgimtarët në Bruksel

Presidenti i Shqipërisë, Bujar Nishani është takuar me përfaqësuesë të mërgatës shqiptare në Bruksel.

Krijimi i një ministrie për emigracionin, mësimi i gjuhës shqipe, e drejta e votës, lehtësimi i proçesit për marrjen e një çertifikate, apo i shtetësisë shqiptare, janë disa nga problemet që hasin qytetarët e Shqipërisë jashtë vendit, për të cilat presidenti Bujar Nishani premtoi se do t’ia transmetojë Qeverisë dhe Parlamentit.

“Nuk mund të jetë shqetësim kjo gjë dhe shteti ka gjithë detyrimet e për detyrë që të krijojë të gjitha lehtësitë e nevojshme për këto raste. Ajo që unë do të bëj është që do t’ia transmetoj qeverisë shqetësimet tuaja“, ka thënë Niashi.

Shteti ka për detyrë që të krijojë të gjitha lehtësitë e nevojshme për emigrantët.

Nga ana e tyre, emigrantët treguan për problemet e ndryshme me të cilat ballafaqohen jashtë vendit.

“Në Shqipëri, ne në fakt nuk kemi një ministri, por ka një institut dhe drejtori të posaçme pranë Ministrisë së Jashtme, pra departament të posaçëm, i cili merret tërësisht me çështjet e diasporës. Por që pavarësisht si ndërtohet ky institucion, ne kemi nevojë ta kemi më dinamik”, ka thënë presidenti shqiptar, transmeton TCH.

Numri i shqiptarëve në Belgjikë vlerësohet të jetë rreth 60 mijë.

Ata kanë emigruar në periudha të ndryshme, para dhe pas viteve ’90, nga Shqipëria, Kosova, Mali i Zi dhe Maqedonia.