Menjëherë pas lirimit, arrestohet sërish nga EULEX-i

Elvis Kelmendi nga Peja menjëherë pas lirimit nga drejtësia kosovare, është arrestuar nga policia e EULEX-it

Menjëherë pasi që ishte liruara nga Policia e Kosovës, EULEX-i (Misioni i BE-së në Kosovë për sundim të ligjit) ka arrestuar Elvis Kelmendin nga Peja, pas një urdhërarresti ndërkombëtar lëshuar nga Bosnja dhe Hercegovina. Kelmendi akuzohet se në vitin 2010 në Bosnje ka vrarë boshnjakun Elvis Hoxhiq.

Elvis Kelmendi, djali i biznesmenit Naser Kelmendit, i cili gjendet në listën e zezë të SHBA-ve për veprimtari dhe biznes të jashtëligjshëm, është arrestuar të shtunën në mbrëmje nga policia e Kosovës me urdhërarrest ndërkombëtar. Por, pas mbajtjes 48 orë prapa grilave, ai ishte liruar nga drejtësia kosovare. Burime të gazetës “Zëri” kanë deklaruar se Elvis Kelmendi është liruar pasi që prokurori nuk kishte poseduar dokumente shtesë mbi dyshimet ndaj tij. “Pikë së pari Kosova nuk ka marrëveshje me Bosnjën për ekstradim dhe e dyta është se nëse do të ishte lënda e tij në Kosovë, organet e drejtësisë do ta mbanin dhe si të tillë do ta gjykonin në Kosovë për veprën që dyshohet se e ka kryer në Bosnje”, ka thënë një burim i kësaj gazete. Mirëpo, derisa drejtësia kosovare nuk ka pasur fakte të duhura, ka qenë misioni i EULEX-it i cili e ka pritur te dera e gjykatës. Dhe menjëherë pas lirimit nga kosovarët, ai është arrestuar nga EULEX-i. “Personi i arrestuar mbrëmë dyshohet për vrasje të rëndë të Elvis Hoxhiq të kryer në vitin 2010 në Bosnje dhe Hercegovinë. Rasti është duke u hetuar nga një ekip i përbërë nga  një prokuror i EULEX-it dhe një prokuror vendor”, ka njoftuar zëdhënësi i EULEX-it, Blerim Krasniqi. Edhe EULEX-it, Kelmendi mund të gjykohet në Kosovë për vrasjen që dyshohet se e ka kryer në Bosnje. Ndryshe,  Kosova dhe Bosnja nuk kanë marrëveshje policore, për faktin se Bosnja nuk e ka njohur pavarësinë e Kosovës. Një mundësi ekstradimi është e mundur vetëm nëse në këtë mes ndërhynë UNMIK-u.