Policia e Kosovës nuk do ta lejojë Vuçiqin në liqenin e Ujmanit

Policia e Kosovës tha sot se do të veprojë në kuadër të planit të qeverisë së vendit në vizitën e planifikuar për nesër të Presidentit të Serbisë, Aleksandar Vuçiq, në veri të Kosovës.

Përderisa Vuçiq është duke insistuar që ta vizitojë edhe liqenin e Ujmanit, i cili ndodhet në pjesën veriore, Ministria e Punëve të Jashtme ia ka refuzuar kërkesën për ta vizituar këtë vend.

Në një deklaratë për KALLXO.com, drejtori i Policisë së Kosovës, Rashit Qalaj, tha se Policia do t’i zbatojë urdhrat e qeverisë gjatë kësaj vizite.

“Policia e Kosovës do te jetë aty. Policia e Kosovës nuk do të lejojë që të thehet qëndrimi i planit të qeverisë”, tha drejtori i përgjithshëm i Policisë së Kosovës, Rashit Qalaj, për KALLXO.com, përcjell Albinfo.ch.

Ai tha se Policia “do të ndërmarrë të gjitha masat të cilat janë paraparë” për vizitën e Presidnetit serb në Kosovë.

“Plani i policisë është bërë në përputhje me agjendën e qeverisë e cila ka kundërshtuar vetëm një pikë nga kërkesa e Vuçiq. Nuk do të jetë sfidë kjo për Policinë e Kosovës pasi që është hartuar plani për vizitën e Vuçiq në Kosovë”, tha drejtori Qalaj.

---