4 miliardë pasagjerë fluturuan më 2017 në mbarë botën

Foto ilustrim

Kompanitë ajrore në mbarë botën kanë transportuar më shumë pasagjerë se kurrë më parë. Vitin e kaluar ata transportuan 4 miliardë pasagjerë.

Me 4.1 miliardë klientë, numri ishte 7.3 për qind më i lartë se një vit më parë, siç njoftoi Shoqata Botërore e Aviacionit IATA në Montreal, përcjell albinfo.ch.

Rritja më e madhe u arrit më 2017, me 10.6 për qind në rajonin e Azi-Paqësorit, i cili në të njëjtën kohë përfaqëson tregun më të madh me 1.5 miliardë pasagjerë. Kompanitë ajrore evropiane gjithashtu shënuan rritje mesatare prej 8.2 për qind, në 1.1 miliardë pasagjerë, megjithëse disa kompani falimentuan, për shembull “Air Berlin” dhe “British Monarch Airlines”. Në Amerikën e Veriut rritja ishte vetëm 3,2 për qind, në 942 milionë klientë.

Gjithnjë e më shumë njerëz tani kanë mundësinë të fluturojnë, tha shefi i IATA, Alexandre de Juniac.

Përveç zhvillimit ekonomik, sipas IATA, linjat ajrore në gjithë botën ofrojnë fluturime direkte në mes të gjithnjë e më shumë qyteteve.

Në vitin 2017 numri i çifteve të qytetit, me të paktën një fluturim në javë, është rritur në më shumë se 20,000. Kështu, numri është dyfishuar që nga viti 1995.