Agjencia Kosovare e Ushqimit dhe Veterinarisë ka marrë vendim për t’i kontrolluar të gjitha ngarkesat me peshk që kanë origjinë nga Tailanda, për shkak të dyshimit se ky lloj peshku përmban histaminë. Sipas kësaj agjencie, dy maune janë ndalë në terminalin kufitarë për t’ua bërë analizat shtesë.

 

“Pas marrjes së informatës se Peshku që është me origjinë nga shteti i Tailandës ka prezencë të ‘’Histaminit’’, AVUK ka marrë vendim që ky lloj peshku të ndalohet në kufij deri në marrjen e rezultatit të analizave për prezencën apo jo të histamines në peshk”, tha Lamir Thaçi, zyrtar për Informim në AVUK.

Dy maune me peshk, sipas tij, tani janë të ndaluara në kufij, duke pritur analizat nga laboratorët adekuat, për të nxjerr të vërtetën se a posedojnë apo jo elemente që e rrezikojnë produktin.

 “Vetëm atëherë kur dëshmohet përmes argumenteve se ky peshk është i shëndosh do të lejohet të futet brenda në vend dhe do të lejohet për konsum”, tha Thaçi.

Ai tha se AVUK është duke punuar ngushtë më të gjitha autoritetet kombëtare për ushqim të vendeve që eksportojnë për Kosovë, për të kontrolluar secilin ushqim që dyshohet se mund të jetë i kontaminuar.

 “Po ashtu kemi kontakte edhe me organizatat botërore qe merren me siguri ushqimore dhe na dërgojnë informata të vazhdueshme për të gjitha ndryshimet apo rreziqet që paraqiten në vende të ndryshme për produkte të ndryshme”, tha ai.

 Qytetarët e Republikës së Kosovë, sipas zëdhënësit të AVUK-ut, duhet të ndjejnë veten të sigurt në produktet që konsumojnë, pasi ato, siç tha ai, i nënshtrohen kontrollit të Agjencisë së Ushqimit dhe Veterinarisë.

 “Ne i kontrollojmë të gjitha produktet, qofshin ato nga importi apo prodhime vendore në tërë zinxhirin deri në tryezën e konsumatorit”, tha Thaçi.