Si e përjetuan tërmetin e fuqishëm shqiptarët e Alaskës

Familjet që jetojnë në Anchorage të Alaskës, kanë përjetuar tmerr të vërtetë gjatë një tërmeti të fuqishëm më 30 nëntor të këtij viti

Një tërmet i fuqishëm i magnitudës 7 shkallë, të premten e kaluar tronditi jugun e Alaskës, shkruajnë mediat e huaja, njofton albinfo.ch.

Tërmeti ka krijuar një panik të madh në Anchorage, një qytet i njohur për tërmete të shumtë.

Deri më tani nuk është raportuar asnjë viktimë, por disa të plagosur që janë vendosur nëpër spitale. Policia ka raportuar “dëmtim të gjerë të infrastrukturës” në qytetin kryesor të këtij shteti të veriut, të Shteteve të Bashkuara.

Një bashkatdhetar yni në këtë qytet ka postuar një video, në të cilën vërehen lëkundjet e mëdha të tokës, në zyrën e tij, informon albinfo.ch. “Zyra jonë sot herët gjatë tërmetit të orës 7.00. Vetëm statuja e Skenderbeut nuk u rrëzua”, shkruan në profilin e tij në Facebook, Nijazi Musliu, ish-gazetar i të përditshmes “Rilindja”, i cili ka përjetuar tmerrin e asaj dite.

Përndryshe, nëpër rrjetet sociale janë përhapur regjistrime të shumtë në të cilët mund të shihet dridhja e fuqishme e tokës. Banorët kanë gjetur strehim në hapësirat e nënqiellit, siç rekomandohet në raste të tilla. “Tërmeti ishte mjaft i fuqishëm sa për të hedhur objekte jashtë rafteve dhe për të shkundur shtëpitë në të gjithë rajonin”, shkruan Anchorage Daily News, gazeta kryesore e Alaskës.

 

---