Ujqërit mbysin 150 dele në Lezhë

Përveç dëmit material, raportohet, se banorët e kësaj zone janë të rrezikuar nga epidemia, pasi që delet e ngordhura kanë mbetur në hapësirë duke kundërmuar

Temperaturat e larta duket se kanë “tronditur” një ujkonjë e cila me këlyshët e saj, kishin sulmuar një tufë delesh në rajonin e Lezhës në Shqipërinë e mesme, duke i mbytur rreth 150 prej tyre. Dëmi material konsiderohet se është shumë i madh, paqmë delet ishin një soj i veçantë i sjellë nga Greqia 

 Përveç dëmit material, raportohet, se banorët e kësaj zone janë të rrezikuar nga epidemia, pasi që delet e ngordhura kanë mbetur në hapësirë duke kundërmuar.

 Ngjarja jo e zakontë, siç raporton “Shekulli” është shënuar në fshatin Torovicë të Lezhës. Mësohet se çobani është larguar vetëm për një moment nga tufa e deleve, ndërsa kur është kthyer është përballur me një skenë “horrori”.

 Siç tregojnë banorët e zonës, një ujkonjë me këlyshët e saj ishte parë në zonën përreth, por që asnjëherë nuk kishte ndodhur që kafshët e egra të vërsuleshin edhe në fusha, duke mos kursyer edhe disa kuaj që ndodheshin pranë kullotës së deleve.

 Dëmi i shkaktuar është shumë i madh, pasi delet mësohet se ishin blerë në Greqi me një çmim prej 200 euro për copë, pa përfshirë këtu edhe transportin.