Kompensohen 700 pasagjerë për vonesat në aeroport 

Rritja e fluksit të lëvizjes së pasagjerëve drejt dhe nga Aeroporti Ndërkombëtar “Nënë Tereza” në Rinas është shoqëruar edhe me rënie të numrit të vonesave dhe anulimeve të fluturimeve gjatë muajit janar 2019. 

Autoriteti i Aviacionit Civil bën të ditur se nga të dhënat zyrtare rezulton se kompania me numrin më të madh të vonesave ka qenë kompania “Fly Ernest”, me 7 fluturime me vonesë, një prej tyre mbi 6 orë dhe me 1 anulim fluturimi. “Kompania e dytë me më shumë vonesa renditet “Blue Panorama”, me vetëm 4 të tilla dhe asnjë anulim fluturimi, një performancë e përmirësuar ndjeshëm nga kjo kompani krahasuar me të njëjtën periudhë të vitit 2018, përcjell albinfo.ch

Kompania e tretë është “Adria Airways” me 1 vonesë dhe 1 anulim gjatë muajit janar”, theksohet në njoftim.  Aktualisht kompanitë ajrore kanë kompensuar me rreth 250 euro ose me bileta rreth 700 pasagjerë që kanë plotësuar formularët e ankimit për shkak të vonesave apo anulimit të fluturimit të tyre.

 Nga të dhënat zyrtare kompania që respekton të drejtën e pasagjerëve për kompensim mbetet “Blue Panorama”, me rreth 500 kompensime të mbyllura dhe një numër të madh në proces. Kompania “Wizz Air” gjithashtu ka kompensuar një numër të konsiderueshëm pasagjerësh, duke shkuar në 74, pavarësisht se renditet ndër kompanitë më serioze në respektimin e orareve.