Instituti i Shëndetit Publik në Shqipëri thotë se nuk ka epidemi AH1N1

Instituti i Shëndetit Publik thotë se Shqipëria nuk ndodhet në ndonjë epidemi, por ka aktivitet me intensitet të lartë të gripit. Sipas ISHP-së , në Shqipëri si dhe në vendet e rajonit mbizotëron qarkullimi i virusit të tipit A, nëntipi A/H1 pdm09. 

“Të gjitha mostrat e ardhura janë testuar me metodën molekulare të Real-Time RT PCR. Nga testimi i tyre nga 1 Janari deri në 11 shkurt janë identifikuar 329 persona të prekur me virusin A të gripit, nga të cilat: 231 (70.2%) viruse janë nëntipi A/H1pdm09 , 20 (6.1%) viruse nëntipi A/H3 dhe 78 (23.7%) viruse tipi A – nëntipizimi është në proces”, thuhet në njoftim, përcjell albinfo.ch

ISHP thekson edhe njëherë, se AH1N1 është grip sezonal tek i cili vaksina antigrip vepron dhe ofrohet falas për grupet me më shumë risk.