Vetëvendosje: Haradinaj të reagojë ndaj krimit në Telekom

Lëvizja Vetëvendosje i ka bërë thirrje kryeministrit të Kosovës, Ramush Haradinaj, që t’i japë udhëzime komisionit që është formuar për Telekomin, për ta ndërprerë kontratën me Z moblie.

Deputeti nga radhët e VV-së, Liburn Aliu, ka thënë se komisioni i formuar më 17 janar nuk ka siguri se çfarë funksioni do të ketë dhe se kjo kontratë duhej të ndërpritej prej kohësh.

“Nëse kryeministri Hardinaj e lejon të kalojë në këtë formë, në gjendje të heshtur, atëherë do të konsiderojmë se ai është bashkëfajtor në këtë krim që po i bëhet Telekomit”, tha deputeti Aliu.

Ndërsa, anëtari tjetër i kësaj partie, Fatban Bunjaku, përsëriti se kjo kontratë është e dëmshme dhe duhet të ndërpritet menjëherë. Sipas tij, Vala ka humbur nga kontrata me Z moblie nëntë deri në dhjetë milionë euro në vit, si dhe 30 milionë nga kontrata e dëmshme.