Batalioni “Atlantiku” i dha masivitet bashkimit të diasporës në UÇK

Presidenti i Kosovës, Hashim Thaçi, ka pritur pjesëtarët e batalionit “Atlantiku”. Ai ka thënë se batalioni “Atlantiku”,  i ka dhënë jehonë luftës së UÇK-së.

“Edhe fati i vendit tonë është i lidhur drejtpërdrejt me rolin dhe kontributin e jashtëzakonshëm dhe historik që e ka dhënë komuniteti shqiptaro-amerikan në Shtetet e Bashkuara të Amerikës dhe në përgjithësi diaspora jonë. Ju keni qenë strumbullari, mund të them lirisht i atij organizmi, i atij masiviteti, i bashkëngjitjes në Ushtrinë Çlirimtare të Kosovës”, u shpreh presidenti Thaçi.

Ish-komandanti i batalionit “Atlantiku”, Gani Shehu, theksoi se rrugëtimi i batalionit ishte pjesë e një angazhimi shqiptaro-amerikan përgjatë dekadave në komunitetin shqiptar në Shtetet e Bashkuara të Amerikës.

Presidenti ka theksuar se ardhja e pjesëtarëve të batalionit “Atlantiku”, në 20-vjetorin e hyrjes në Kosovë, është një energji e re për të gjithë bartësit e institucioneve.

Ndërsa me rastin e Ditës së Veteranëve të Koshares dhe rënies së heroit Sali Çekaj, është mbajtur akademi përkujtimore, në të cilën kryeministri Haradinaj ka thënë se rëndësia e luftës që u bë në Koshare është shumë e madhe dhe historike.

Kryeministri pohoi se heroi Sali Çekaj ishte përballë armikut në adresë të atdheut dhe jo politikës. Ai ka thënë se vendi ka marrë shumë mësime për t’i udhëzuar brezat e ri.