Hungaria: Hapje sa më parë të negociatave të Shqipërisë me BE-në

Qëndrimi i gjithë spektrit politik dhe qeverisë hungareze në favor të hapjes sa më parë të negociatave me BE, ishte kryefjala e takimeve që një delegacion parlamentar i kryesuar nga Mimi Kodheli, kryetare e Komisionit për Politikën e Jashtme dhe i përbërë nga deputetët Paulin Sterkaj dhe Ediola Braha, zhvilluan në Hungari me ftese te Kryetarit te Komisionit te Jashtem, Zsolt Nemeth. 

Delegacioni shqiptar zhvilloi takime me zëvendës Kryetarin e Parlamentit hungarez, Istvan Jakab, me Kryetarin dhe anëtarët e Komisionit të Jashtëm, me Grupin parlamentar të miqësisë Hungari – Shqipëri, kryesuar nga Agnes Vadai si dhe me Peter Sztaray, Sekretar Shteti për Çështjet e Sigurisë në Ministrinë e Punëve të Jashtme. 

Në takime u theksuan lidhjet tradicionale miqësore si dhe marrëdhëniet aktuale shumë të mira e të gjithanshme midis Shqipërisë dhe Hungarisë. Bashkëbiseduesit diskutuan çështje të bashkëpunimit dypalësh si dhe u shkëmbyen mendime mbi çështje të interesit të përbashkët si perspektiva europiane, stabiliteti dhe siguria rajonale sikurse dhe roli i parlamenteve në promovimin e bashkëpunimit, besimit dhe miqësisë midis popujve, shkruan atsh, përcjell albinfo.ch. 

Kodheli informoi kolegët hungarezë mbi situatën në Shqipëri, mbi reformat e thella që po zbatohen ne vend dhe përkushtimin e përpjekjet serioze që shoqëria shqiptare bën në rrugën drejt integrimit uropian, duke falenderuar Hungarinë për ndihmën dhe mbështetjen e saj të vazhdueshme në rrugën tonë drejt progresit dhe afrimit me BE. 

Bashkëbiseduesit hungarezë shprehën vlerësimin e tyre për kontributin e popullit shqiptar në mbrojtje të vlerave europiane, stabilitetit të rajonit dhe sigurisë të kufijve të jashtëm të BE. 

Ata i siguruan kolegët shqiptarë si për lobimin dhe për mbështetjen e vendosur dhe aktive të Shqipërisë në përpjekjet e saj për zhvillim dhe integrim ne BE.