Shfrytëzimi i pakontrolluar i fëmijëve në internet

MPB në Maqedoni konfirmon për rritjen e padive sa i përket keqpërdorimit të të dhënave personale veçanërisht në rrjetet sociale, nga ana e fëmijëve

Nxënësit e shkollave fillore dhe atyre të mesme janë shfrytëzuesit me të mëdhenj të internetit në Maqedoni, e që shpeshherë përbën shqetësim për prindërit por edhe për  mësimdhënësit e tyre. Këta fëmijë, sipas sociologëve, janë të ekspozuar ndaj krimit kibrentik.  

 

Një vit që Agjencia për Komunikim Elektronik është duke promovuar programin për mbrojtjen e fëmijëve nga internet. Përmes këtij programi, prindërve u mundësohet të kontrollojnë kohën, njëherësh edhe aktivitet e fëmijëve të tyre gjatë përdorimi të internetit edhe kur ata nuk janë në shtëpi.

 

Sociologu Ibish Kadriu nga Universiteti Shtetëror i Tetovës, thotë për REL se nevojiten masa urgjente nga ana e institucioneve përkatëse për reduktimin e përdorimit të internetit, veçanërisht te nxënësit e shkollave fillore.

 

Sipas tij, problem në vete paraqet dhe fakti se fëmijët kanë më shumë njohuri se prindërit e tyre kur bëhet fjalë për përdorimin e internetit.

 

“Në bazë të disa hulumtimeve shkencore që kemi bërë në kuadër të USHT-së, duke pasur në fokus prindërit dhe nxënësit shihet se mungon kontrolli nga ana e prindërve, mungon kontrolli nga ana e arsimtarëve dhe veçanërisht ka keqpërdorim të informacioneve të cilat ofrohen në internet në moshën e mitur”, shprehet Kadriu.

 

Edhe nga Ministria e Punëve të Brendshme bëjnë të ditur se është në rritje numri i padive sa i përket keqpërdorimit të të dhënave personale veçanërisht në rrjetet sociale.

 

“Po është në rritje shkelja e ligjit që vlen për rrjetet sociale që kryesisht kanë të bëjnë me shkeljen e privatësisë në rrjetin social Facebook dhe rrjetet tjera, veçanërisht te të rinjtë dhe miturit”, shprehet drejtori i Drejtorisë për Mbrojtje të të Dhënave Personale, Dimitar Gjeorgjievski.

 

Ai shton se në sistemin arsimor të Maqedonisë nuk ekziston asnjë njësi mësimore ku mbrojtja e të dhënave personale është përmendur ose i kushtohet rëndësi e veçantë.

 

Ndërkohë, prindërit thonë se gjatë garës së informacioneve, fëmijët jo rrallë herë ballafaqohen edhe me informacione që nuk janë të përshtatshme për moshën e tyre.

 

“Po djali im është në shkollë fillore dhe arsimtarët jo rrallë herë e urdhërojnë që për më shumë informata rreth mësimeve në lëndë të ndryshme të konsultohen me internetin. Kuptohet se qëndrimi disa orësh në internet të ofron edhe gjëra të cilat janë në dëm të zhvillimit të mirëfilltë të fëmijëve”, shprehet Agim Saliu prind.

 

Ndërkohë, sipas një hulumtimi të bërë nga Universiteti Shtetëror i Tetovës, departamenti i sociologjisë, del në pah se përdorimi i pakontrolluar i internetit ndikon dhe në manifestimin e sjelljeve agresive te fëmijët.

---