Qeveria miraton formimin e Ushtrisë së Kosovës

Ministri i Mbrojtjes, Agim Çeku tha se misioni i Forcave të Armatosura të Kosovës është që të jenë gjithmonë të gatshme për ta mbrojtur sovranitetin e Kosovës

Qeveria e Kosovës e ka zyrtarizuar të martën vendim për transformonin e Forcës së Sigurisë së Kosovës në Forcat e Armatosur të Kosovës (FAK), si dhe ka vendosur që Ministrin e FSK-së Agim Çekun ta “shndërrojë” në ministër të Mbrojtjes të Republikës së Kosovës.

 “Siç kemi deklaruar me 17 shkurt të këtij viti, sot po vendosim që Forca e Sigurisë së Kosovës të shndërrohet në forcat e Armatosura të Kosovës dhe rrjedhimisht të ndryshoi misionin, detyrat, strukturën dhe madhësinë”, deklaroi kryeministri Hashim Thaçi.

Po ashtu Ministria e FSK-së të shndërrohet në Ministrinë e Mbrojtjes së Kosovës, deklaroi me tej kryeministri.

Ministri i FSK-së, Agim Çeku, ndërkaq tha se detyrat që do t’i ketë FAK-u, janë mbrojtja e sovranitetit dhe integritetit territorial të Kosovës, mbështetja e autoriteteve civile, mbështetje komuniteteve si dhe operacioneve në misione ndërkombëtare në mbështetje dhe ruajtje të paqes.

“Misioni i Forcave të Armatosura të Kosovës është që të jenë gjithmonë të gatshme ta mbrojnë sovranitetin, integritetin territorial, për t’i mbrojtur qytetarët, pronat e tyre dhe interesat e Kosovës, si dhe të kontribuojë në ndërtimin dhe ruajtjen e paqes dhe stabilitetit rajonal dhe atij global”, ka thënë Çeku.

Gjenerali i kthyer në politikë tha se FAK do të zhvillohet nëpërmjet tri fazave.

“Faza e parë fillon në këtë vit e përfundon më 2016 kur ne do t’i bëjmë ndryshimet e nevojshme kushtetuese dhe ligjore, pastaj riorganizimi i strukturës së FAK në përputhje me ligjet e reja; faza e dytë ka të bëjë me ngritjen e kapaciteteve të komandës, kontrollës, komunikimit si dhe pajisje me armatim e me pajisje tjera; dhe faza e tretë që ka të bëjë me kompletimin e FAK me personel, me pajisje, me trajnime”, sqaroi Çeku.

Ndërsa tani kjo çështje do të kaloi në Kuvendin e Kosovës, ku pritet të bëhen ndryshimet e nevojshme ligjore e kushtetuese.

Forcat e Armatosura të Kosovës, do të kenë 8 mijë ushtarë, prej tyre vetëm 5 mijë të jenë aktiv, ndërsa pjesa tjetër rezervë. Sipas ekspertëve të sigurisë, FAK nuk do të ketë armë të rënda artilerie dhe aviacion të avancuar, por do të jetë e gatshme për të garantuar tërësinë territoriale të Republikës së Kosovës.