Nxënësit shqiptarë të Sllovenisë mbajnë orë mësimi në Kosovë

MDIS

Me qëllim të njohjes së traditave e kulturës së vendit të tyre, nxënësit shqiptarë nga Sllovenia po marrin pjesë në një ekskursion në Kosovë, përcjell albinfo.ch. Madje, ata do të mbajnë edhe një orë mësimi në një shkollë të Kosovës.

Përgjatë katër ditëve të këtij ekskursioni, ata do të vizitojnë disa vende në Kosovë dhe në Shqipëri. Gjatë ditës së sotme ata janë në pritur në Ministrinë e Diasporës, njëherësh organizator i këtij aktiviteti.

Zëvendësministri Isni Kilaj është shprehur i lumtur që po takon nxënës dhe mësues që janë të interesuar ta ruajnë kulturën, gjuhën dhe traditën shqiptare, njofton MDIS. 

“Qëllimi i ministrisë është që përmes organizimeve si ky sot, por edhe të tjerave t’i mbani kontaktet me atdheun për të ruajtur gjuhën, kulturën e traditën”, është shprehur zëvendësministri Kilaj.

Ndërkaq, mësimdhënëset dhe nxënësit e falënderuan ministrinë, si dhe ministrin Dardan Gashi. Ata thanë se komuniteti shqiptar në Slloveni kurrë më parë nuk kishte një lidhje kaq të afërt me Kosovën.

Në ditën e dytë në Kosovë ata do të  vizitojnë edhe një shkollë të Mushtishtit të Suharekës, ku do të mbahet orë e përbashkët mësimi dhe do të jepet një program kulturor. Më pas, do të vizitojnë memorialin  “Adem Jashari” në Prekaz.