Pjesëmarrje e ulët në zgjedhjet në Shqipëri, Rama: Nuk iki!

Komisioni Qendrorë i Zgjedhjeve në Shqipëri ka njoftuar se pjesëmarrja në shkallë vendi e votuesve në zgjedhjet lokale të cilat i refuzoi opozita ishte 21.6 për qind.
Kryeministri Edi Rama bëri të ditur se në muajin korrik do të nisë një debat i brendshëm brenda Partisë Socialiste për të korrigjuar gabimet në qeverisjen qendrore dhe lokale, transmeton albinfo.ch.
Deklarata e kryeministrit u bë në fjalimin falënderuar pas përfundimit të procesit të votimit për zgjedhjet lokale të 30 qershorit.
Rama tha se organizatorët e revolucionit imagjinar që kaluan vijën e kuqe të ligjit do të ndëshkohen.
Gjatë fjalës së tij, Rama u shpreh se vajzat dhe gratë në administratat e bashkive të djathta nuk do të largohen nga puna.
Pas mbylljes së procesit të votimit, ka reaguar kryetarja e LSI-së, Monika Kryemadhi. Në një status në Facebook, Kryemadhi thotë se sot 85% e shqiptarëve refuzuan kryeministrin Rama.
E Kryetari i Partisë Demokratike, Lulzim Basha, i cilësoi votimet për zgjedhjet e 30 qershorit një farsë, që u refuzua masivisht jo vetëm nga mbështetësit e opozitës por edhe vetë socialistët.
“Sot shqiptarët braktisën në masë maskaradën e votimit njëpartiak të Edi Ramës. Me refuzimin paqësor të 30 qershorit u tregua forca e një populli të bashkuar përtej ndarjeve partiake. Edhe socialistët e braktisën Ramën. Sot kumboi mesazhi i qartë i shqiptarëve: Me këtë refuzim paqësor por të vendosur ne kemi shënuar një kthesë historike, një monument kombëtar të qëndresës dhe qytetarisë”, ka thënë ai.