Nderohet sot në Vjenë atdhetari dhe studiuesi, Prof. Dr. Skënder Gashi

Sonte në Vjenë mbahet mbledhje komemorative me rastin e ndarjes nga jeta e veprimtarit të çështjes kombëtare dhe LDK-së, Prof. Dr. Skender Gashi

Sot, e premte, më 12 korrik 2019, në orën 19:00 në Vjenë mbahet mbledhje komemorative me rastin e ndarjes nga jeta e veprimtarit të çështjes kombëtare dhe LDK-së, Prof. Dr. Skender Gashi.

Dr. Gashi ka ndërruar jetë në qytetin e Vjenës, ku edhe kishte jetuar së fundmi.

Dr. Gashi studimet i kreu në Universitetin e Prishtinës, magjistraturën në Zagreb dhe doktoroi në Universitetin e Salzburgut në Austri.

Gashi ishte udhëheqës i katedrës së Gjuhës Shqipe në Universitetin e Vjenës për më shumë se dy dekada.

I ndjeri dha shumë për Institutin Albanologjik të Kosovës.
Ishte themelues, udhëheqës e nënkryetar i LDK-së për Evropë dhe mik e bashkëpunëtor i ngushtë i presidentit Ibrahim Rugova.

Dr. Gashi është njohur si një nga onomastët kryesor të Kosovës e Shqipërisë dhe ka të botuara me qindra punime shkencore e dhjetra libra në Austri, Kosovë, Shqipëri e Kroaci.

Ishte autor i revistës së vetme shkencore për kulturën dhe historinë shqiptare në gjuhën gjermane, revistës shkencore “Dardania”.

Kjo mbledhje komemorative organizohet nga aktivistët e LDK-së në Vjenë, me ç`rast në orën 20:00 do të mbahet Kuvendi zgjedhor i LDK-së në Austri, ku do të zgjedhet Kryesia e re.

Ftohen të gjithë anëtarët e LDK-së nga të gjitha nëndegët të marrin pjesë në këtë takim, thuhet në njoftimin e Degës së LDK-së për Austri.

Adresa: Alaudagasse 2, 1100 Wien. Hotel & Restaurant Primus.

---