Anija përplaset me dy ura të Rajnës në Bazel

Ata që e kanë parë aksidentin thonë se fare afër anijes ka pasur njerëz duke notuar në ujë dhe barka me udhëtarë, por, për fat, nuk ka të lënduar

Në lumin Rajnë (Rhein) që përshkon qytetin e Bazelit, një anije e madhe mallrash ka goditur në mbrëmjen e sotme dy ura që lidhin dy pjesët e qytetit. Aksidenti që konsiderohet i rëndë, edhe pse nuk ka pasur viktima, ka ndodhur në segmentin e rezervuar për notarë, në mes të dy urave, shkruan 20minuten.ch dhe mediet e tjera zvicerane.

Ata që e kanë parë aksidentin thonë se fare afër anijes ka pasur njerëz duke notuar në ujë dhe barka me udhëtarë, transmeton albinfo.ch. Por për fat, nuk ka të lënduar.

Forcat e shpëtimit, përfshirë policinë dhe zjarrfikësit, kanë shkuar në vendin e ngjarjes.

“Pas ndeshjes me urën e mesme të Rajnës, anija e mallrave ka dalë nga kursi që mbante. Për pasojë ajo është përplasur në shtyllat e urës tjetër, të radhës (Johanniterbrücke), shkruajnë mediet lokale.

Dëshmitarët thonë se bëhet fjalë për një anije rumune me defekt.

Policia Kantonale e Bazelit deri më tash nuk ka dhënë detaje lidhur me aksidentin. Megjithatë, sipas një zëdhënësi të zjarrfikësve, anija ka pasur një defekt në motor, kështu që ka qenë e penguar për të manovruar, përcjell albinfo.ch.

Anija ka mundur përfundimisht që me ndihmën e anijeve të zjarrfikësve, të ndalet dhe të përforcohet në urën Dreirosenbrücke.

(Foto: 20minuten.ch)

---