Temperatura rekorde në Zvicër: 38 gradë celsius në Sion

Megjithatë, thyerja e rekordit të të gjitha kohëve, të regjistruar në Zvicër, duket të jetë ende larg. Ai ishte 40.5 gradë dhe është regjistruar më 11 gusht 2003

Në Sion (Sitten, kryeqyteti i Kantonit Valis) është regjistruar sot temperatura më e lartë për Zvicër në këtë sezon. 38 gradë celsius, është shkalla që ka treguar termometri sot në këtë qytet të regjionit jugor të Zvicrës, duke shënuar kështu edhe temperaturën më të lartë të regjistruar ndonjëherë në Sion, shkruan srf.ch.

Rekordi i deritashëm në këtë qytet ishte ai i 7 korrikut 2015, 37 gradë celsius.

Por, jo vetëm në Sion janë shënuar temperatura të larta sot, shkruan albinfo.ch. E gjithë Zvicra po “vlon” nga vapa, ndërsa autoritetet kanë paralajmëruar për masa mbrojtjeje.

Megjithatë, thyerja e rekordit të të gjitha kohëve të regjistruar në Zvicër, duket të jetë ende larg. Ai ishte 40.5 gradë dhe është regjistruar më 11 gusht 2003 në  Grono të Kantonit Graubünden, transmeton albinfo.ch.

Në fakt, zhiva në termometër atë ditë ishte ngjitur në 41.5 gradë, por meteorologët e kishin kontestuar këtë shifër, pasi që termometri ishte vendosur në një vend shkëmbor, që, sipas tyre, nuk është vendi i duhur për të matur temperaturën. Kështu, si “kompromis”, ishte pranuar temperatura prej 40.5 gradësh celsius.

Vala e temperaturave të larta në Zvicër pritet të përfundojë këtë të shtunë.

---