Grabitësit e plagosin mërgimtarin nga Zvicra, ai vret njërin prej tyre

Një i vdekur e një i plagosur është bilanci i ngjarjes që ka ndodhur rreth orës 03:20 në Shtime

Në orët e hershme të mëngjesit, në Shtime ka ndodhur një tentim për grabitje me pasoja të rënda.
Një i vdekur e një i plagosur është bilanci i ngjarjes që ka ndodhur rreth orës 03:20 në këtë qytezë

Katër persona të maskuar kanë hyrë në një shtëpi të një mërgimtari nga Zvicra, i cili sapo ishte kthyer, shkruan koha.net.

Mehmetali Hajdini, major në Policinë e Kosovës, teksa e ka konfirmuar lajmin për Koha.net, ka dhënë detaje.

“Rreth orës 03:20 katër persona të maskuar kanë hyrë në një shtëpi. Dyshohet se qëllimi i tyre ka qenë grabitja. Janë ballafaquar me pronarin e shtëpisë, kanë kërkuar dorëzim prej tij, por ai është nuk është dorëzuar”, ka thënë Hajdini. Pastaj njëri nga grabitësit ka nxjerrë revolen dhe ka shti në drejtim të pronarit të shtëpisë.

Ai e ka plagosur pronarin e shtëpisë, dhe pastaj grabitësit kanë filluar të ikin prej aty. Pronari i shtëpisë duke zbritur poshtë e ka takuar vëllanë e vet në oborr, i cili e ka dëgjuar krismën. Kanë nisur t’i ndjekin grabitësit”, ka thënë Hajdini për Koha.net

Në ndjekje e sipër ata janë takuar me njërin prej tyre.

“Dyshohet se ka pasur goditje të dyanshme, ku njëri nga grabitësit ka gjetur vdekjen aty për aty, prej plagëve të marra”, ka thënë Hajdini.

Policia, ka thënë Hajdini, është në fazën e grumbullimit të të dhënave tjera.

 

---