Greqia, në alarm për refugjatët

Ilustrim

Pamje të ngjashme me ato të krizës migratore të vitit 2015 kanë regjistruar kamerat në ishullin Lesvos të Greqisë 24 orët e fundit. Të paktën 13 barka me mbi 550 refugjatë, prej të cilëve thuajse gjysma janë fëmijë, kanë mbërritur në ishull prej brigjeve turke.

Ato janë shoqëruar nga katër anije të flotës ushtarake greke dhe me pas refugjatët janë dërguar në kampin e Morias, i quajtur tashmë edhe si i “Ferri i Tok­ës”, pasi është kampi më i madh në Europë me mbi 10.241 refugjatë, ndërsa kapaciteti i tij është disa herë më i vogël dhe kushtet janë tepër çnjerëzore.

“Kanë çrregullime të stresit posttraumatik, përpjekje për vetëvrasje, depresion, këto janë raste shumë të rënda. Viktima të torturave, viktima të dhunës, viktima të abuzimit seksual. Këto janë raste shumë të vështira që, natyrisht, përkeqësohen në kamp me këto kushte jetese dhe kjo i bën të pavlefshme procedurat e tyre të azilit”, tha Marco Olla.

Mbërritja e refugjatëve të fundit, por në përgjithësi tendenca në rritje e javëve të fundit e fluksit të emigrantëve në ishull ka krijuar shqetësim të madh te Qeveria greke.

Ministri i Jashtëm, Nikos Dhendias, ka thirrur urgjent ambasadorin turk në Athinë dhe i ka dhënë një notë proteste, duke i shprehur pakënaqësinë e tij për këto zhvillime. Gjithashtu shqetësimi është rritur pas deklaratave të ministrit të Jashtëm turk, Cavusoglou, i cili ka paralajmëruar se përsa kohë vazhdojnë operacionet ushtarake të Asadit në Idlib të Sirisë, fluksi i refugjatëve drejt Europës do të rritet.

Kryeministri grek Mitsotakis ka thirrur të shtunën mbledhjen e jashtëzakonshme të Këshillit Kombëtar të Sigurisë për të përballuar urgjentisht situatën dhe një nga masat e para është transferimi i të paktën 1000 refugjatëve në kampin “Nea Kavala” ,pranë Selanikut, shkruan TCH, përcjell Albinfo.ch.