Falsifikonte dokumente të tatimit në pronë, arrestohet zyrtari në Gjilan

Dyshohet se ka falsifikuar dokumente/vërtetime që ndërlidhen me tatimin në pronë

Policia e Kosovës, konkretisht Njësia Kundër Krimeve Ekonomike dhe Korrupsionit në Gjilan njofton se pas hetimeve disamujore, me autorizim të prokurorisë kompetente ka siguruar dëshmi në lidhje me dyshimin e arsyeshëm se i dyshuari me iniciale B.K., zyrtar në Gjilan, dyshohet se ka falsifikuar dokumente/vërtetime që ndërlidhen me tatimin në pronë.

“Policia sot, më 09.09.2019, e ka intervistuar të dyshuarin në prezencë të avokatit sipas autorizimit dhe pas intervistimit të dyshuarit me aktvendim të prokurorit të njëjtit i është caktuar masa e ndalimit për 48 orë”, thuhet në njoftimin e PK-së.

Më tej në njoftim thuhet se Policia e Kosovës mbetet e përkushtuar në realizimin e detyrave dhe autorizimeve të saj dhe pavarësisht rolit dhe funksionit që kanë individë të caktuar, veprime ligjore do të ndërmerren në vazhdimësi në bashkëpunim edhe me autoritetet e tjera të drejtësisë, me qëllim parandalimin e rasteve të tilla, përcjell Albinfo.ch.

---