Zeqiraj: “Krenare me çmimin që fituan aktoret e mia të preferuara”

"Jam e lumtur dhe krenare me këtë çmim që iu dha të gjithave së bashku, nga pamundësia qe t’a dallojnë më të mirën nga ansambli i interpretimit kaq të bukur koral"

Pas njoftimit mbi çmimin e rëndësishëm që filmi “Shpia e agës” e fitoi në Festivalin e Cottbus-it, Gjermani, albinfo.ch ka kontaktuar regjisoren Lendita Zeqiraj.

Regjisorja e suksesshme ekskluzivisht për albinfo.ch me këtë rast thotë se “ky vlerësim i cili iu dha ansamblit të aktoreve të mia të preferuara, është një nder i shumëfishtë për mua si regjisore. Jam e lumtur dhe krenare me këtë çmim që iu dha të gjithave së bashku, nga pamundësia qe t’a dallojnë më të mirën nga ansambli i interpretimit kaq të bukur koral”.

E pyetur nga albinfo.ch për planet e afërta lidhur me filmin, Zeqiraj thotë se “në të njëjtën kohë filmi “Shpia e ages” tani është i përzgjedhur dhe është duke u shfaqur ne “Zinebi Film Festival” (edicioni i 61) në Bilbao, që është festival i kategorisë A. Por unë aktualisht  jam në Cottbus dhe nuk kam pasur mundësi te jem prezente në të dy festivalet.

Nesër udhëtoj për në Kalkuta, Indi. Pas premierës së indisë, filmi do ta ketë premierën sllovene. Ndërsa menjëherë pas asaj e kemi premierën franceze ne festivalin  “Les Arcs”, e cila është e fundit për këtë vit”, përfundon regjisorja Lendita Zeqiraj.

---