Njëra ndër ngjarjet më tragjike në këtë fatkeqësi natyrore është vdekja e gjashtë anëtarëve të familjes Cara.

Në një lidhje direkte në emisionin Info Magazinë në Klan Kosova, familjari i viktimave, Isuf Cara, ka treguar se nipi i tij, Albert Cara, i cili i ka mbijetuar nga kjo tragjedi, tani ndodhet për trajtim në Itali dhe është jashtë rrezikut për jetë.

“Ka qenë një fatkeqësi natyrore që na e ka shkulur shpirtin. Ishte një ndërtesë pesë katëshe, ku në katin e parë kisha përfaqësuesit e xhaxhait, ndërsa në katin e gjashtë kisha djalin e xhaxhait – Zoti na i fali dy fëmijë dhe na i mori shtatë”.

“Në momentin që ka ndodhur tërmeti, ne kemi kontaktuar me të afërmit tonë. Të gjithë ne i telefononim Albertit, i cili ndodhet për trajtim në Itali. Kishte 50 vjet që xhaxhai qëndronte në banesë. Ka qenë një tërmet që nuk mbahet mend në Thumanë – një tërmet që është shoqëruar me mijëra të tjera”.

“Unë kisha një komunikim me ministren e Shëndetësisë, e cila më tha se kanë bërë përpjekjet maksimale për ta shpëtuar Albertin. Pasi ai ka arritur në Itali, stafi i mjekimit atje na ka dhënë shpresë që do ta bëjnë një trajtim shumë profesional”.

“Almiri (26-vjeçar) ka qenë i fejuar me një vajzë nga Korça. Ata vendosën së bashku të ndërtojnë një jetë të re, por Zoti i paska dashur më shumë dhe i mori për vete”.

“Kur janë bërë gërmimet, pothuajse e gjithë familja ka qenë e lidhur. Ndërsa për shpëtimin e Albertit, ka qenë puna e jashtëzakonshme e Ushtrisë së Kosovës dhe ne u jemi mirënjohës atyre tërë jetën”.

“Unë mund të them se ndihma e parë dhe më e vyer ka qenë komuniteti dhe banorët e zonës së Thumanës. Ka qenë një interesim i jashtëzakonshëm i Shqipërisë, Kosovës dhe vendeve të tjera.

Kujtojmë se nga familja Cara humbën jetën Almiri, 26-vjeçar, Erisa 25-vjeçare, Hasani 18-vjeçar, Fatmira 53-vjeçare, Sadajana 21-vjeçare dhe Anthi 72 vjeç, përcjell albinfo.ch.