Thaçi fton Ramën që të heqin kufirin dhe doganat ndërmjet dy shteteve

Presidenti Hashim Thaçi i ka bërë thirrje kryeministrit të Shqipërisë, Edi Ramës, që qysh sot të nënshkruajë një marrëveshje ndërshtetërore për heqjen e kufirit dhe doganave Kosovë – Shqipëri.

Në konferencën e fundvitit, Thaçi ka thënë se Kosova është e gatshme që qysh sot të heqë kufirin dhe doganën, duke thënë se jemi vëllezër dhe një komb.

“Konfirmoj në emër të institucioneve të Kosovës, Kosova qysh sot, jo nesër, qysh sot është e gatshme të marrë vendim për heqjen e kufirit dhe doganës dhe çdo barriere tjetër me Shqipërinë, qysh sot, çdo barrierë që kemi mes shteteve të Kosovës nuk ka nevojë të shtyhet nesër, do të ishte mrekulli sikur viti 2020 të fillojë me vendimin për heqjen e kufirit dhe doganës mes shtetit të Kosovës dhe Shqipërisë, për çka e ftoj mikun tim, kryeministrin Edi Rama, të marrë këtë vendim, unë jam gati”, thotë ai.

Tutje, presidenti shton se nuk mund të priten teket e shtetit serb. Sa i përket raporteve me Edi Ramën pas Samitit të Tiranës, Thaçi ka thënë se vlerëson kontributin e mikut të tij të zgjedhur, shkruan indeksonline, përcjell albinfo.ch.

“Ne jemi vëllezër, nuk do të mund të tradhtoj as interesat e Shqipërisë, as për Kosovën, sepse të dy shtetet tona funksionojnë si shtete normale, me kushtetuta dhe shtete moderne.

Vlerësoj kontributin e mikut tim, kryeministrit të Shqipërisë, Edi Rama është miku im i zgjedhur, vlerësoj angazhimin e tij për paqe dhe stabilitet, por, në të njëjtën kohë vlerësoj që Serbia duhet të trajtohet me një tjetër gjuhë, në fakt iniciativa të cilat kanë ndodhur kjo është pozicioni si shtet, duke mos e trajtuar Kosovën si shtet të pavarur i ofrojnë alibi Serbisë për shtyrjen e njohjes”, ka thënë Thaçi.

---