Cilat janë përfitimet e tjera nga vendosja e maskave

(KEYSTONE/Salvatore Di Nolfi)

Vendosja e përdorimit të maskës në mënyrë të detyrueshme jo vetëm që i bën njerëzit t’i përdorin ato, por gjithashtu i bën ata të ndërmarrin sjellje të tjera mbrojtëse, siç janë distancimi social, larja dhe shmangia e shtrëngimit të duarve, raportojnë studiuesit.

Studiuesit vëzhguan një grup prej 7 mijë gjermanësh në periudhën mes prillit deri në fund të majit, rreth 1 mijë persona në javë.

Kur përdorimi i maskave u bë i detyrueshëm në publik më 27 prill në Gjermani, numri i njerëzve që mbanin maska ​​për fytyrën u rrit ndjeshëm dhe mbeti i lartë edhe në mesin e atyre që mendonin se imponimi është i ekzagjeruar, transmeton Monitor, përcjell albinfo.ch.

Para se maska të bëhej e detyrueshme, vetëm 20 për qind e të anketuarve mbanin maska. Ndërsa pasi u vendos masa, në fund të majit 80 për qind e pjesmarrësve në anketim deklaruan se përdornin maskë, sipas studimit, të publikuar në revistën ‘Proceedings of the National Academy of Science’.

Përdorimi i maskës nxiti edhe sjellje të tjera mbrojtëse:

-Pothuajse tetë herë më shumë në larjen e duarve;

-Deri në 20 herë më shumë në shmangien e shtrëngimit të duarve;

-Deri në 13 herë më shumë në mbajtjen e distancës sociale sesa pjesëmarrësit që nuk mbanin maskë;

Një nëngrup me më shumë se 900 vullnetarë iu kërkua të imagjinonin një skenar në të cilin ata ishin në departamentin e frutave në dyqanin lokal me një person tjetër.

Disa pjesëmarrësve iu tha që ekziston një masë e detyrueshme për përdorimin e maskës, ndërsa disa të tjerëve iu tha që përdorimi i maskës ishte me zgjedhje; disa të tjerëve iu tha që personi tjetër përdorte maskë, ndërsa të tjerëve iu tha se personi tjetër nuk përdorte një të tillë.