Nuk arrihet marrëveshje në takimet e Berset me drejtorët e shëndetësisë

Masat e fundit nuk kanë treguar efektin e dëshiruar, tha Berset në një konferencë të mediatike me Presidentin e Drejtorëve Kantonalë të Shëndetësisë, Engelberger

Ministri i Shëndetësisë Alain Berset, pas konsultimeve me drejtorët kantonalë të shëndetësisë, që posa kanë përfunduar, theksoi edhe një herë rëndësinë e vaksinimeve përforcuese në luftën kundër pandemisë së koronës.

Masat e marra në javët e fundit nuk kanë pasur ende efektin e dëshiruar, tha Berset në një konferencë të përbashkët mediatike me Presidentin e Drejtorëve Kantonalë të Shëndetësisë (GDK), Lukas Engelberger, transmeton albinfo.ch. Duket se ato nuk ishin të mjaftueshme – këtë e tregon edhe krahasimi me vendet e tjera.

Engelberger gjithashtu theksoi se kantonet kanë konstatuar ekzistimin e nevojës për veprim. Ai nuk komentoi masat specifike që ishin objekt i konsultimit në vazhdim mbi propozimet e Këshillit Federal, të bëra të premten. Asgjë nuk është vendosur në mbledhjen e së hënës, ka thënë ai.

Në veçanti, Berset theksoi se ritmi i vaksinimeve përforcuese duhet të rritet – në mënyrë që të gjithë ata që dëshirojnë, të mund të marrin një vaksinë të tretë. Kantonet po përballen me një sfidë të madhe logjistike, përcjell albinfo.ch.

Qeveria Federale bën shumë për t’i mbështetur ato – veç tjerash nëpërmjet përdorimit të ushtrisë.

“Të gjithë kemi të njëjtin qëllim”, tha Berset. Në lidhje me variantin omicron, shumëçka është ende e paqartë – veçanërisht në lidhje me atë se a shkakton rrjedhë të rëndë të sëmundjes te njerëzit e vaksinuar dhe nëse po, sa shpesh.

Krahasimi me Afrikën e Jugut është problematik, sipas Berset. Mosha mesatare atje është më e ulët – dhe imunizimi nga infeksionet dhe vaksinimet e kaluara është më i lartë në përgjithësi.

Megjithatë, situata është shumë e tensionuar për shkak të variantit delta, veçanërisht në spitale, tha Berset. Prandaj është thelbësore që kantonet të miratojnë masa më të rrepta mbrojtëse sesa qeveria federale aty ku është e nevojshme.

---