Ish-ministri gjerman: BE të mbajë premtimet për liberalizimin e vizave

Ish-ministri gjerman, sërish për Evropën, Michael Roth, ka thënë se Bashkimi Evropian duhet të mbajë premtimin për liberalizimin e vizave, përcjell albinfo.ch.

Ai këto deklarata i ka bërë pas një takimi që ka pasur me të dërguarin special të BE-së për dialogun Kosovë-Serbi, Miroslav Lajçak.

Roth ka shtuar se Ballkani Perëndimor i takon BE-së, duke kërkuar gjithashtu nga BE-ja që të nisë negociatat për pranimin e Shqipërisë dhe Maqedonisë së Veriut.

“Shtetet e Ballkanit Perëndimor na takojnë dhe meritojnë më shumë se veç fjalë goje. BE-ja duhet t’i mbajë premtimet, duke nisur nga bisedimet për pranim me Shqipërinë dhe Maqedoninë e Veriut, e liberalizimin e vizave për Kosovën”, ka shkruar Roth në Twitter.

Me qëndrimin e tij është pajtuar edhe Lajçak, i cili ka rishpërndarë deklaratën e Roth, duke shkruar se “nuk mund të pajtohesha më shumë me vlerësimin tuaj”.

Michael Roth kishte shërbyer në postin e ministrit shtetëror për Evropën në periudhën 2014-2021, nën Angela Merkelin.