Kosovë: Këngëtarët e gastronomia, nën llupën e inspektorëve tatimorë  

Sipas ATK-së, gastronomia është njëri nga sektorët që prodhon shmangie tatimore.

Ka shumë këngëtarë në Kosovë që paguajnë vetëm 500 euro tatim shtetit kur marrin pjesë në një aheng familjar, por në fakt, çmimi për një dasmë shkon deri në 10 mijë euro.

Kështu deklaroi sot drejtori i përgjithshëm i Administratës Tatimore të Kosovës, Ilir Murtezaj, i cili në konferencë për media theksoi se gastronomia është njëri nga sektorët që prodhon shmangie tatimore.

“Në këtë rast kemi përgatitur projektin e veprimit, ku me anë të një kampanje i kemi informuar të gjithë aktorët në përputhje me të gjitha deklarimet nga legjislacioni tatimor”, tha Murtezaj, transmeton Albinfo.ch.

Ai po ashtu bëri të ditur se Administrata Tatimore e Kosovës (ATK) shumë shpejt do të fillojë aktivitetin e tyre për të evidentuar aktivitetet për veprimtarinë gastronomi/hoteleri, këngëtarë, si dhe sallonet e bukurisë në sezonin e verës.

“Kjo mospërputhje sigurisht se do të reflektojë me veprimet tona dhe pastaj pas afateve të rregullta ne do të jemi të detyruar që fillimisht të bëjmë krahasimin e tyre me të dhënat që ne i kemi, ne do të vazhdojmë me procedurat tona ndëshkimore”, tha Murtezaj.

 

---